喺日本小住回港一星期,肌膚仍在努力適應香港嘅天氣中。
雖然日本係乾啲,喺室內又日日開行暖氣,但人哋啲空氣真係清新好多!就算出完街一日,個鼻哥窿都冇黑蚊蚊嘅。
喺返香港之前,已經知道香港嘅空氣受到 PM2.5 嘅影響變得唔多好,講真我都有啲擔心!
喺日本住嘅時候,我冇時間日日護膚,皮膚係乾啲之外,其實都冇咩其他問題。好啦,返咗嚟香港之後呢?做返日常最 routine 嘅護膚,結果卻係爆到一面瘡同暗粒,肌膚處於敏感嘅狀態中 :(
雖然話原因唔可以一概而論,但係外在嘅因素 (天氣濕度+空氣污染) 卻係嫌疑最大!
今次接受嘅係 SNOW FOX ALL DAY DEFENSE CREAM 全日型防護乳液嘅試用。第一次接觸 SNOW FOX 呢個牌子,感覺新鮮。
按照慣例,但凡所有第一次用嘅產品,都要上網起起底,了解吓個品牌同產品,咁先至用得安心又放心!
產品背景:
1. 台灣製造
2. 冇 Parabens (防腐劑一種) , SLS (對皮膚具刺激性) , Phthalates (塑化劑一種), Petrochemicals (石油化學製品)
3. 100% 天然及純素成份
4. 冇用動物做測試
5. 針對嬌嫩及非常敏感肌膚使用,不過都適合任何膚質使用
產品主要成份:
1. 人參幼根:人參係最有效嘅抗氧化成份
2. 荷荷芭油:出名補濕啦~
3. 夏威夷果油: 促進細胞生長,加快傷口的癒合
4. 薄荷油萃取物:天然殺菌及防腐劑
包裝上有列明其他成份,果然唔見有任何化學成份,感覺真係十分安全可靠!
第一次用後感:
質地望落好似牙膏咁好厚,但其實就好易推同好容易被皮膚吸收。
搽嘅時候乸乸哋!乸嘅原因我相信有兩個:
1. 之前提及過嘅薄荷油萃取物係有天然殺菌嘅功效,所以喺啲出粒粒位會乸。
2. 相信係呢隻 cream 能夠滲入皮膚底層,所以皮膚乾嘅位都會乸。咁即係代表咩呢?即係我平日用緊嘅 cream 只係停留咗喺皮膚嘅表層,效果即時高下立見!咁唔怪之得之前我做親皮膚測試都實係話我肌底乾啦!
但係其實會唔會係皮膚唔適合用呢隻護膚品,所以先乸呢?
我都有一刻懷疑過,不過見皮膚冇紅又冇腫,所以我知道佢唔係唔受得隻護膚品先有乸嘅感覺。
瞓醒第二朝,真係唔講得笑,啲粒粒謝晒!同埋冇再出新嘅粒粒啦!連續日日爆新瘡﹑一波未平一波又起嘅我,皮膚終於得到歇息嘅機會 :D
混合粉底液用後感:
年初四趁未返工,就出街會吓啲朋友。今日我仲將啲 cream 同粉底液 mix 埋嚟用。上晒妝,嘴角都仲係有啲乾乾哋,所以我再 on top 加咗啲 cream 上去,個妝都冇花。因為呢隻 cream 寫到明係可以妝前打底用或者完妝搽都得嘅!第二次用,塊面已經冇再乸。出完街大半日,都唔覺得塊面乾,幾好。
總結:
1. 對肌底乾爆嘅我嚟講,呢隻 cream 可以滋潤到肌膚底層,我覺得好正!但係肌膚表面就略嫌唔夠滋潤。我會嘗試配合埋佢嘅 mask 嚟用,睇吓效果會唔會好啲!
2. 對死懶鬼嘅我嚟講,呢隻 cream 集爽膚+精華+乳液於一身,實在係懶人恩物!如果喺日本我有呢支 cream 傍身,我冇藉口唔護膚咯!大大力推介畀好忙/好懶嘅你。除咗慳時間之外,肌膚搽一層 cream 就得到搽三層嘢嘅效果,其實都起到減輕肌膚負擔嘅作用,讚!
3. 用呢隻 cream 之前,鼻哥好容易出油,所以黑頭粉刺嘅問題一直都幾困擾我 :( 用呢隻 cream 前後只係三次,鼻哥已經冇咁容易出油,同埋一用清黑頭針就好明顯少咗好多嘢要清出嚟!唔怪之得產品說明話長期用,係可以改善到黑頭粉刺嘅問題啦!
4. 我有信心長期使用呢隻 cream,真係可以幫到我對抗到皮膚乾旱同 PM2.5 嘅問題!
5. 最後溫馨提示就係,就算成份再天然嘅護膚品,用咗都有皮膚敏感嘅可能性。之前試用某大牌子嘅產品,就係對「成份天然」呢四個字放下咗戒心冇做 skin test,就搞到我塊面,特別係個鼻哥甩晒皮,足足兩個月先好返晒 :( 所以,大家試用新產品之前,都不忘要喺耳背等位置搽少少,睇吓會唔會有過敏反應先好全面搽啦!咁既然 SNOW FOX 嘅產品啱我用,我當然會繼續全力支持啦!