自我介紹
年近 40，皮膚由內至外都乾，冇日日都隔日敷 mask 都無補於事。啲皮膚都好情緒化﹑好脆弱，少少嘢都會敏感一大餐。幼紋﹑乾紋﹑色斑唔會少，但求老得慢啲﹑老得靚啲，咁就心滿意足啦！第 1 次接觸 YVES ROCHER (下稱 YR) 嘅產品。
2/27 Day 1
皮膚問題：額頭細紋，鼻頭﹑面頰毛孔尤其粗大，鼻頭泛油，皮膚乾燥，嘴角四周爆瘡，色斑，暗粒，鬆弛。
第 1 次使用
精華吸收得好快，基本上一推開咗就已經吸收晒！好鍾意！日霜就「立」少少，不過畀多少少時間佢吸收；基本上，換完衫，化妝之前就已經吸收晒！以我皮膚缺水嘅程度，日霜可以再滋潤多啲都唔怕。不過春天咁潮濕嘅天氣嚟講，呢隻質地爽得嚟夠潤，幾好。
最鍾意佢唔 artificial 嘅香氣！法國嘢通常都勁香，YR 冇，香得嚟好 natural！
搽完皮膚即係帶有亮澤感，鼻頭同面頰毛孔有即時收細，代表產品夠滋潤。平時上完妝前底霜，上埋粉底，都仲要畀少少遮瑕膏先可以遮到鼻哥啲毛孔，今日竟然唔使落遮瑕膏！
平時呢，放工返到屋企，就會見到鼻頭已經出晒油，啲粉都花晒。今日返到屋企，見到個鼻啲妝仲完好，感動到呢！證明 YR 嘅精華同日霜真正滋潤到我嘅皮膚，而且佢嘅滋潤並唔係得三分鐘熱度，係足夠我夜晚再護膚前嘅需要！
有好嘢，梗係要捉埋阿媽試啦！呢個人用死一隻牌子就唔會轉，之前我叫佢用第二隻牌子佢都唔睬我。今日我用完一次之後，佢睇到我用完嘅效果，竟然肯即刻攞咗 YR 盒日霜嚟用。而事實就係，YR 呢盒潤過佢而家用緊嗰盒 (我都用過) 好多咯！
第 2 次使用
下爬四周本來摸落都鞋手，因為之前爆瘡都係啱啱先謝晒。夜晚搽第二次，摸落已經滑晒！好神呀！的確，唔打好皮膚嘅基礎，又點對抗日益嚴重嘅污染問題呢？
自己平時有用肌底液，而家 skip 咗冇用皮膚都仲潤過之前。即係話，用 YR 就首先可以慳咗買肌膚液嘅錢先！哈哈~
2/28 Day 2
肌膚觸感比昨日柔軟，好有彈性。
額頭明顯滑咗好多，啲紋淡咗好多。
呢兩日頭 3 次都要搽兩層精華同日霜，搽完雙頰都有啲乸，我知我真係好乾。不過夜晚搽第 4 次就已經可以搽返一層就夠潤啦！
肌膚穩定性提高唔少！由之前狂爆瘡，到呢兩日，日日朱古力+薯片+辣嘢都完全冇事，我就知我之前嘅皮膚問題，都係因為皮膚乾﹑唔關熱唔熱氣事啦！
3/2 Day 4
因為支爽膚水用晒，就換咗支新嘅，同之前用緊嗰支唔同牌子。冇諗過，塊面咁就敏感了 :( 出咗好多粒粒 >< 但係，咁又 remind 咗我，YR 啲嘢其實都幾適合我用喎！用咗幾日都冇皮膚敏感。
3/3 Day 5
夜晚沖完涼護膚，臨瞓前去刷牙，發現塊面啲敏感粒粒冇再紅腫！嘩！完全冇諗過會有咁嘅效果！
3/5 Day 7
事實勝於雄辯，效果你自己睇相吧！
整體嚟講，皮膚滋潤度﹑飽滿度﹑光澤度﹑毛孔細緻度都有顯著嘅改善。如果我唔係中途搞出個皮膚敏感，相信出嚟嘅效果會更加明顯，皮膚細緻度都會加好多分。
精華同日霜都適合香港潮濕天氣時使用。之前日日濕度 80% 以上，有日仲 94% 㖭！但係呢兩隻產品用喺塊面度，都唔會話好「立」，唔會增加皮膚嘅負擔。
總結
第一次用會覺得佢哋唔係好夠滋潤，但隨住使用嘅次數越多，我覺得產品有幫到我嘅肌膚補水。所以，我認為 YR 呢款精華同日霜都足夠我春夏嘅肌膚需要。到冬天時，再測試過吧！
我有信心，由我而家開始用，直至我真真正正去到 40 歲，都 keep 住用 YR 嘅產品嘅話，相信我一定可以無愧地自稱為美魔女！哈哈~
