唔知點解呢度話停產咗，我嗰盒上兩個月先買。

咁我本身未用過火山泥mask，所以第一次想買隻最基本嘅款試吓，買呢隻mask之前我上晒外國網做research，幾乎個個都會話啲泥好快乾，要快啲用晒佢，所以我當面問BA姐姐呢隻泥會唔會好快乾，咁當然佢都答返我話應該係佢哋個蓋扭唔實啫，雖然我知係廢話不過都係買咗返屋企試用。

而事實上我好肯定我次次都扭到個蓋實一實，爭在未扭爆個樽，啲泥個consistency都已經開始變杰，我大概淨係用咗3~4次左右，搽上臉已經杰到好難推開，淨係搽咗半邊臉啲泥已經乾晒，做唔返第一次搽嗰種又creamy又平滑嘅感覺，我可以foresee到再用多幾次啲泥真係會變到硬晒。

咁講返個效果，首先收毛孔效果係有嘅，好多外國用家建議上mask之前做埋facial scrub會令深層清潔效果更好，咁facial scrub本身係會整到毛孔好大，但係我照做完再用咗呢隻mask之後毛孔仲細咗啲，呢點真係要讚。

而深層清潔效果就麻麻哋，我本身成日生黑頭粉刺同hormonal acnes，用完之後冇話特別有改善，要生都係會繼續生，生咗嘅都唔覺得有減少到，我畀埋我男朋友用佢反而仲生多咗粒瘡，佢仲同我講用完呢隻mask之後好快又出過油。

但係relatively speaking，呢隻mask用完真係唔會乾，我試過1個禮拜用4次，又或者每次敷成半個鐘，塊臉都冇話乾到扯住扯住，雖然清潔能力真係好低，不過對於乾肌、敏感肌人士嚟講可能用呢隻mask會啱啱好。

用完之後皮膚真係滑咗細緻咗，摸落好舒服好軟綿綿，不過佢真係做唔到深層清潔效果，所以我淨係會畀3分，期待將來會有機會試埋超級火山泥毛孔清潔緊實面膜2X。