產品簡介
1）成份：
• 排第二嘅係氯化鈉，即係生理鹽水。排第一
同第二都係水，難怪搽落面會畀人嘅感覺佢
只係水！（事實當然係 this is more than
just water 啦 ?）
• 排第五嘅丙氨酰谷氨酸，上網查過係保濕成
份嘅嘅。第四嘅透明質酸鈉同第五都係保濕
嘢啦！
2）主要功效：
• 撫平皺紋
• 激活細胞
• 提升彈力
3）使用方法：一早一晚各用半支。開封 12
小時內要用晒佢。
4）詳情參閱官網：https://www.bioderma.hk/chan-pin-jie-shao/matriciane/zhu-huo-xi-bao-neng-liang-sheng-hua-shui#tab-02
Bioderma 呢隻再生水聲稱連續使用8星期，就能夠令肌膚回復返去 20 歲時嘅狀態，聽落真係心動到不得了！今次試用 15 日，照咁計，肌齡咪可以逆轉 5 年！挑戰開始！
2月1日
最近嘅皮膚問題都係同過往差唔多，不過最近天氣雖然潮濕，但我面頰竟然甩皮！因為我又皮膚敏感啦！平時素顏唔覺㗎，但係一化妝就出晒事！
先嚟睇睇我嘅皮膚問題：
1） 面頰兩邊都有唔同程度嘅甩皮
2）額頭凹凸不平，有瘡仔同好多暗粒
3）鼻頭嘅凹凸洞好明顯
4）嘴四周皮膚好敏感，容易生瘡
5）下爬 line 有啲鬆弛
6）眼鏡鼻托位皮膚好差
7）下爬同頸中間啲皮膚好鞋
8）額頭淺紋幾多吓
9）頸紋勁深又多
第一次用完嘅感覺係，嘴周圍同面頰呢兩個最弱雞位，有明顯嘅拮拮哋。咁就證明咗再生水同普通水係真係有分別嘅先 ? 另外就係敏感皮膚都適用，我用完冇紅冇腫冇痛，用得好放心。
之後最明顯見到嘅分別就係我鼻頭啲窿窿平滑咗啲。
觸感方面，摸落好似有層嘢包住皮膚咁，好滑手。
夜晚用埋嗰半支：已經冇咗嗰種拮拮哋嘅感覺。
三大期望：
1）用幾多日啲皮膚會穩定啲
2）我最介意嘅鼻頭凹凸窿可以修復到幾多呢？
3）頸紋可以淡幾多呢？
2/2
一瞓醒就照吓鏡先，甩皮嘅地方冇晒事！係冇晒！雖然摸落都有啲鞋鞋哋，未完全好返晒，不過上完妝塊面已經唔會好似琴日咁一撻撻，好神奇呀！
額頭啲粒粒都好咗好多，成塊面望落滑返晒，上妝容易好多！
用咗一支已經咁好效果，amazing！
鼻頭窿窿都有改善，希望你繼續加油！
成塊面摸落仲係鞋手同唔夠潤、乾到好繃緊，要努力改善！
2/3
一瞓醒照鏡，嘩！完全見到啲皮膚好咗好多！洗完面，摸到右邊面頰同嘴邊仲有少少鞋之外，其他地方已經完全好返晒！額頭啲瘡都差少少就好晒㗎啦！
另外就係今日明顯 feel 到成塊面緊緻咗！
頭兩日用，塊面搽完係勁水汪汪，等好耐都唔吸收。趕時間都唔等咁多啦，照搽眼霜精華面霜。今日皮膚吸收力好咗好多！基本上我搽完再生水，都未搽眼霜佢已經吸收晒，個分別就係喺呢度啦。
2/4
用咗 3 支，已經 99.9% 靚晒啦塊面，係差額頭兩粒仔暗瘡未謝晒咋！已經達成第一個期望，皮膚狀態好穩定、好好！
今日先摸吓個下爬同頸中間個位，滑到不得了！曾經做完 facial，個美容師話我呢個位鞋到好似貓脷咁。我承認我之前係完全忽略咗呢個位都要保養，而家滑返晒啦！
而家可以重點照顧 3，6，8，9 啦！
其實額頭同頸啲紋都已經淡咗，真係好感動，要繼續加油！
鼻托位啲皮膚都靚咗好多，冇之前睇到咁粗咁龜裂。
鼻頭啲窿窿都好咗，今晚試吓清吓黑頭，睇吓會唔會對件事有幫助先。
2/5
用完五支，對比返個 before，神奇吧！
完全冇妝，冇執相㗎！
唔係再生水，我都唔可以今日大年初一用啲靚皮膚示人！你知有啲親戚一年先見一次……
2/11
用完第十支，又係對比吓嘅時候啦！
比起五日前最大嘅分別係，皮膚帶有一層自然嘅光澤！
用到第七支，需要用嘅分量明顯係少咗好多。開頭用呢1ml，一早一晚用，面同頸係啱啱夠用。到第七支，呢1ml嘢好似神蹟咁用極都用唔晒！但基於開咗之後12小時內要清咗佢，唔留得，所以夜晚嗰轉，面同頸要搽3、4次先用得晒。
而家嘅皮膚吸收力都好咗好多。以面霜為例，之前搽我要重覆搽兩三次，我先覺得夠。而家搽一次就搞掂。
仲有就係皮膚嘅觸感，用之前我覺得皮膚已經失去佢嘅彈性，個人望落就係顯老嘅狀態。而家摸落啲皮膚好軟熟，睇落真係後生咗呀個人！
最後就係今日碰上了生理期。之前每次呢啲時候我都會生三、四粒瘡，仲要輪住嚟爆。今次呢，兩日前爆咗粒喺鼻旁，掂到會痛。到今日都仲係得呢粒，冇發大，今日已經收晒咁滯，已經冇晒觸痛（琴日都仲有少少）。估唔到呢啲時候，皮膚狀態都可以咁穩定喎！以前係人哋一望就知我唔方便，今日睇嚟應該冇人知啦！
我而家只係用咗10日，皮膚其實已經好過我35歲嗰陣，逆齡5歲超額完成！而家皮膚狀態似我30歲頭咁上下啦！即係啲皮膚好咗成10年！
而家係差條頸，希望可以再好啲！始終呢啲地方最容易出賣真實年齡，呢度都執返掂嘅話，呢個產品用過世我都願呀！鼻頭都仲有進步空間，人真係想一得二 ?
2/15
今日終於用晒15支啦！好用嘅產品，我真係會好唔捨得佢用晒。
今日先第一次化返妝，同之前最明顯嘅唔同，就係好貼妝。我不嬲皮膚都乾，今日化妝真係化得好開心，化完望吓額頭啲火車軌，係冇！
之前化完啲火車軌係會仲明顯咗，今日望落係滑嘅！仲有光澤㖭！頸嘅情況都係一樣，啲紋淡咗好多，化埋妝就可以完美隱藏到 ✌?
嚟個總結啦：
1. 修復力滿分—從肌底修復
• 敏感肌、容易爆瘡嘅朋友特別適合使用，
再生水真係可以幫到你改善同穩定肌膚
• 咁深嘅皺紋都可以喺短短15日有咁明顯嘅
改善，真心佩服！
2. 瞬間吸收力—唔「立」
• 皮膚嘅吸收力大有改善，你會覺得啲護膚
品好用咗
• 我最怕啲護膚品「立」痴痴，再生水係搽
落似水，但保濕力一流嘅水精華
3. 與其用錢買補品（燕窩、花膠……）食，或
者食膠原蛋白，我會用呢筆錢嚟買再生水
• 食落肚對身體好係一定，但論指定皮膚質
素改善，再生水先做到
• 舉個例，食燕窩、膠原蛋白啲頸紋係唔會
淡咗，但搽再生水得，我就係得咗！
我已經買咗一盒返屋企用啦！一來唔好浪費咗呢15日嘅成績，二來我要繼續挑戰肌膚返返去20歲時嘅狀態！有此成果之時，我再同大家報個喜 ?
