Jasmine Lui

我天生一對熊貓眼，嚴重程度係整個眼圈連眼窩都深色暗啞，又容易出眼油，想眼睛睇嚟精神啲我必定選帶閃亮效果的眼影。至於要解決眼油問題，就要靠眼部打底霜了。 剛試用了Urban Decay這支香檳金色（＃Minor Sin)的Eyeshadow Primer Potion, 如唇彩的棉棒設計，塗用方便，而且單用已有很不俗的閃亮效果。於底霜上再掃上眼影，很明顯色彩好貼好上色，為了讓大家更清楚搽咗底霜，眼影是否真係更貼服持久唔易甩，我掃在手背上，在水龍頭下沖水，見到眼影真係一啲都冇甩色，即使用手指輕捽，眼影仍保持貼服不變。到最後我要用水油混合的眼部卸妝液才能清洗乾淨。證明其防水及持久效果不錯，大可以於香港潮濕的夏天大派用場呀！

起初單看包裝以為是韓牌，後來一看才知是來自澳洲的醫學品牌。一向對採用天然成份配合醫學科研嘅產品特別有好感，睇完佢有海洋萃取加埋一大堆天然植物成份，針對刺激皮膚幹細胞令皮膚進行自我修復，就即刻要試喇。 我慣常厚敷面膜，第一次用，真係厚敷足30分鐘，之後用沾濕的海棉清洗，覺得滋潤感好重，抹極都仲係未乾淨咁，要多洗幾次才乾淨，抹乾後，皮膚感覺出奇地潤滑，而且白淨柔軟咗。隔了兩天，我再用，薄薄全面搽勻，敷咗20分鐘，今次易洗好多，皮膚同樣感覺潤滑柔軟。所以各位敷時，可以慳返，不用厚敷也能做到滋潤修護的效果呀！ 這面膜尤其適合乾性缺水的皮膚，如果經常開冷氣或曬太陽後都特別啱用。但如果怕太潤或油性皮膚未必喜歡那種厚潤感。 個人唯一挑剔的是，估佢唔到咁多天然嘅成份加埋一齊，竟然是濃郁如拖肥的甜味，我個人不太喜歡過甜的味道。

多年前已用過Peter Thomas Roth這王牌青瓜面膜，愛它清爽啫喱質感，有齊蘆薈及洋甘菊兩種最強紓緩成分，好啱香港春夏潮濕天氣用，補濕及紓緩效果一流，每當夏天皮膚曬後，或做完激光療程，我都會雪凍佢來敷面，極速降紅之餘，仲可即時補濕紓緩。額外驚喜還有它含木瓜及菠蘿成分，天然溫和的果酸酵素，所以每次敷完都會覺得皮膚光滑咗㗎！

其貌不揚，感覺有點像澳洲的Aesop，同樣是大sell天然香薰草本，但它是來自瑞典西岸，賣點還有100%有機成份！今次試咗soap及body lotion，能聞得出落重料！香薰味濃郁兼氣味夠天然草本，感覺無添加。Soap一貫透明啫喱液質感，易起泡但泡沫不算豐厚，沖完涼感覺好refresh，皮膚沒有繃緊感覺。而body lotion如乳液質感，輕盈水潤，估佢唔到薄薄地都幾夠滋潤。 不過個人唔太鍾情這兩隻偏向濃烈香草的氣味，觀其品牌官網，發現原來仲有好多唔同香味，反而好想試佢哋嘅野玫瑰系列添！

HOURGLASS雖然喺美國已launch咗十年，但講真我又從來未試過它的產品，今次有機會試它的妝前底霜、眼影及液質唇膏，當中我最愛液質唇膏，外型細細支如USB勁可愛，唇彩設計，好易搽兼十分出色，雖然原色度搽上唇後跟產品有些差別，但呢支＃icon的啞緻酒紅色超靚！我刻意冇搽潤唇膏打底，啞得來一啲都唔乾，不現唇紋之餘，仲有即時填補乾唇紋的作用，一抹即上色，我完全冇用唇掃搽都搽得唔錯呀。唯一係落妝，需要點耐性，及宜選用水油混合的卸妝產品來卸妝。 而妝前底霜，對我來說有點過白，建議塗埋頸部皮膚，免得面同頸兩截色。而眼影質地幼滑兼易上色。今次我試的是＃ambient，個人來說都很喜歡這類earth tone色系，是化裸色妝的必備之選！

一向都很喜歡用佢的Hydra B5 Gel，尤其做完laser facial或HIFU等這類令皮膚易乾的美容療程，一定厚塗來狂補濕，以免皮膚乾到甩皮。而同一系列的mask，如啫喱質感的面膜，剪裁夠貼面兼貼服唔易甩，敷住嚟圍行、睇電視都唔會甩甩下，超讚。講到補濕效果當然一流，敷完皮膚直頭好似飲飽水咁，水潤又飽滿！

同屬神仙水家族，加上我是無油不歡的乾爆肌份子，這精華油當然必試！初試已感到愛上了，半油半精華成份，比神仙水更滋潤，又比一般純油份的護膚油質地清爽。用前先搖勻，我喜歡先取數滴於掌心暖和，後以按印方式搽油，這樣較易吸收。待精華油完全吸收後才塗上面霜，作最後鎖水。即使再乾燥的冬天，有咗呢支護膚精華油都可以撐得住。

斷斷續續用了神仙水近十年了，家裏總有一兩支看門口。家中有太多產品等著我用，雖然唔會長時間每天使用它，但皮膚有一要急救或覺得暗啞時，我就會想起它！平時爽膚水後拍面用，想去角質軟膚，我會配合化妝棉，以輕輕打圈方式全臉抹，如果要急救殘肌，家中又突然冇晒紙面膜，我就會用神仙水來沾濕大片的化妝棉當mask來敷面，敷約5鐘，皮膚即顯得水潤飽滿，萬試萬靈。

在Origins的眾多護膚系列當中，我特別喜歡Dr. Andrew Weil for Origins系列，因為啱晒我乾燥又易敏感的肌膚。試了潔面水及紓緩水，以這個親民價錢有如此質素已是物超所值。先講潔面水，我今朝到中午都唔使化妝出街，試用時，早上已用了潔面產品洗面，但以化妝棉沾上潔面水抹幾抹，又灰又黃，證明3件事，第一是可能早上的潔面產品不夠乾淨；第二是香港空氣污染好嚴重，即使足不出戶，塊面半天就污漕成咁；最後當然是這潔面水潔淨力強，免沖水好方便，洗完皮膚仲唔會繃繃緊。而我個人就很喜歡紓緩水的氣味，有我最愛的天竺葵、薰衣草及薑味，混合起來紓緩又寧神，得閒拍幾拍，對肌膚的即時補濕及鎮靜好有幫助。

試用了剛好一星期，早晚我配合提拉按摩使用。按摩時面霜份量可多取一點，而且記得搽埋腮邊及下巴位，緊緻效果早上尤其明顯。這相片我就是一早起來塗用時拍的，faceline緊緻兼冇水腫。效果唔錯。 驚喜的還有這面霜話明可以用於眼部，眼底點約3點的份量，輕輕向眼角提拉，不知是否心理作用，眼睛看起來都提升了一點，感覺精神了。 由於我的皮膚偏乾，我喜歡先全臉拍上神仙水，才塗用這面霜，於近日寒冷乾燥的天氣都出事，證明其滋潤效果不俗！