我係Aveda支持者，所以就算呢個系列超貴，都買左枝細既洗頭水同埋護髮素試用。我好鍾意佢既自然香味，好舒緩，令人好放鬆，所以每日放工返到屋企，最期待就係用佢洗頭啦！洗頭水質地都幾稀，所以要小心，太用力按個樽的話，會倒出太多洗頭水造成浪費。佢起泡唔多，但網頁指佢既成份有水楊酸，所以泡量雖少仍可有效清潔頭皮。過水後頭髮摸落好鞋，我用埋同系列護髮素，覺得兩者真係絕配！呢條line係針對頭皮的，所以護髮素可以搽埋落頭皮做按摩。我搽完護髮素就沖涼洗面，等三分鐘後先過水，過水後頭髮好滑。吹乾頭後，頭髮非常有光澤！我有敏感頭皮，普通護髮素掂到頭皮的話一定起頭瘡，但我用左Invati有三星期，差不多日日用佢，我頭皮唔單止冇敏感／痕癢／起頭瘡，仲好舒爽同埋少左好多頭皮屑！冇記錯的話，佢應該係Aveda最貴既一條line,但我覺得對敏感頭皮黎講，佢真係救星，而且用完佢，我既頭髮最有光澤，就算係貴價既Kerastase洗頭水都做唔到呢個效果！所以用晒細枝裝，我會買１Ｌ的洗頭水及護髮素。我情願慳錢唔買化妝品，買少Ｄ衫或鞋，都要用Aveda。始終相信女人只要膚質好，髮質好，心地好，個人就會精神爽利同埋有自信。

呢隻洗頭水有好清香既柑橘味，起泡唔錯，清潔力夠而偏向保濕。洗髮後頭髮都幾順，唔容易打kick，我有配合同系列護髮素一齊用，頭髮真係冇咁乾又易梳。天氣乾燥時我比較鍾意呢個系列，而夏天我就鍾意pure abundance多Ｄ。

我有敏感頭皮，容易出油，頭痕，有頭皮屑，頭皮發紅／痛／頭瘡等問題，只要一日冇洗頭，第日就會勁油、勁痕同埋甩好多頭髮，就算冬天都係咁。有時用普通牌子洗頭水，開頭係幾好，但用一排又再出現敏感情況，多年來只有Aveda搞得掂我既頭皮。Pure abundance幾岩我，泡泡細緻，香味清新，去油清潔力夠，但又唔會似brilliant或rosemary mint系列令髮質偏乾，而且我覺得用完佢洗頭後，頭髮感覺真係輕盈Ｄ，冇咁貼實頭皮。雖然佢堅貴，但我情願慳化妝品錢都唔會慳haircare錢。我覺得女人只要膚質好，髮質好，心地好，就自然有女人味同埋氣質，無須太多化妝品。Aveda貴，但值！