通常我去親化妝品專櫃買嘢，啲 BA 都唔建議我用磨砂，因為佢哋話我皮膚易敏感就唔好用磨砂喎！

有啲 BA 講嘅又係另一個相反。話我適合用磨砂唔好用 peeling。

自此之後，我決定信自己。

So far，唔同牌子嘅磨砂同 peeling 我都試唔少，得出嘅結論係兩隻都可以用，冇話絕對用得定唔用得。邊隻用完冇紅冇腫冇痛又有效果，就係適合自己用嘅產品。

最近試咗隻話係成份天然嘅木瓜酵素 peeling 粉，可惜用完冇效果得嚟，用完塊面仲勁乾！乾到我即刻敷保濕面膜都唔掂！

其實，我一直都用緊 Kate Somerville 嘅磨砂。我唯一想搵另一隻產品代替佢嘅原因，其實係因為自己成日會將啲護膚品﹑洗面膏﹑洗頭水...... 入眼；係緊閉雙眼都會入眼咁神奇㗎！始終磨砂粒子細，入咗眼如果處理得唔好，真係可大可小！就係因為咁，所以我先諗住轉用其他產品。

今次試用嘅 LUÉ by Jean Seo-ERASE Cleansing Exfoliating and Brightening Powder (燕麥飄霜) ，淨係睇姓 Seo 就知係韓國人啦！上網睇吓資料，原來 Jean 係美籍韓裔嘅女士 (係，我直覺以為係男人 XD)。佢嘅創業故事都係幾典型嘅 American Dream︰同班朋友坐喺 food court 談論各自的理想，而各人亦在若干年後取得成功。

想當年，food court 我都坐唔少，但明顯我都只係 focus 咗喺啲嘢食度，講得最多嘅就係笑話 XD

Anyways，Jean 嘅美容品牌 évolué，係連 Emma Watson 都有用的！雖然咁樣唔代表啲乜嘢，但就令我好好奇， 喺芸芸咁多大品牌之中，究竟 évolué 有啲咩嘢過人之處，可以吸引到 Emma Watson 嘅注意呢？

點講都冇用，自己試用就最實際。

首先睇吓產品成份先：

1) non-fat milk powder

2) finely milled whole grain oats

3) magnesium carbonate

Magnesium carbonate 就喺好多藥品，甚至乎天然食品入面都會有嘅 (粉狀嘅嘢通常都有，留意吓) ，所以都安全嘅。而呢支燕麥飄霜強調佢哋都係落咗少少啫~

用法：

1) 洗乾淨塊面

2) 比例 2:1 開咗啲粉佢：2 tablespoon 就加 1 tablespoon 嘅水 (2 tablespoon 對我嚟講就多咗啲)

3) 搽上面等 1 分鐘

4) 打圈捽跟住就可以沖水

對我呢啲零耐性嘅人嚟講，1 分鐘呢點要加佢 10 分！

用後感：

1) 用完塊面唔乾喎！

2) 入咗眼都唔乸眼

3) 黑頭粉刺 out，鼻頭好乾淨呀！

4) 有效去角質但又完全唔刺激皮膚

5) 望落塊面膚色較均勻同冇咁油

6) 摸落都好滑呀塊面~

7) 聞落就係燕麥味，好似食咗碗燕麥早餐咁健康 XD

8) 真係可以日日用都唔傷皮膚

開頭覺得淨係奶同燕麥可以做到啲咩出樣？用完又估唔到個效果可以咁好！

即係你話你自己屋企都有奶同燕麥啦，DIY 咪得咯！我見佢嗰套 3-step set (有呢支燕麥飄霜，一支 serum 同一支 spot control) 都係賣 $35 美金，仲 ship worldwide，我就寧願快快趣搞掂啲美容事，花多啲精神時間出去玩好過啦！

總語就係，呢支燕麥飄霜真係做到平靚正之餘，亦係你可以用得安心嘅產品。我正式宣佈，你可以取代 Kate Somerville 支磨砂嘅位置啦！