shuchoux1

極潤系列既呢個乳液好正啊！描述下先，呢個算係一個質地上唔算太輕薄既乳液質地，上面第一分鐘係會覺得有些少粘手，但係過多陣就會好快吸收，粘手感都隨之唔見!我自己就覺得佢有啲舒緩泛紅皮膚既功效，無論係點，佢既保濕效果真係一級啊!

肌研既產品好防敏感而且保濕度做得好好。佢呢支卸妝水卸妝能力真係唔錯，基本上用第一次就已經可以將大部分眼妝卸得好乾淨，如果想確保面上既化妝品全部清理乾淨，會建議抹多一次。用完皮膚無泛紅或者乾，反而係覺得好似上左爽膚水咁保濕。

哇！呢個真係宇宙偉大發明之一！女仔呢普遍基本上頭髮都唔會話剪到差唔多長短，總有啲投薄既地方，所以當要綁起既時候或者流長左一段時間就好容易好亂，東一條西一條！呢個造型膠水真係好幫得手，輕輕摸兩下係頭髮度就做到頭髮好柔順貼服既整齊髮型。佢個設計仲好方便帶出街，有咩需要即刻去廁所補一下就搞掂！

Aveeno呢個沐浴露係gel質地既，有些少麥精既香味啊哈哈！佢起泡力都幾唔錯架，用手都可以起到幾綿密既泡泡。我會推薦係冬天用，因為一黎冬天容易皮膚乾燥，二黎呢因為冬天沖個熱水涼真係無敵舒服但同時好容易帶走身體肌膚既水分同油分令皮膚更加乾燥，所以用呢個就可以清潔身體既時候做好保濕，就可以兩樣兼得啦！

Aveeno呢個潤膚霜既質地都係cream 狀啦，唔會話好厚身，吸收得好快，唔會話好油好油。因為佢呢個係皮膚科醫生都推薦既牌子，就算你皮膚敏感左都唔怕，照樣好保濕唔刺激，皮膚乾既人快啲買支啦！

用護馬毛既野黎洗頭髮啊哈哈哈哈！呢個洗頭水係淺藍色既，啲香味啦，起泡量都唔錯既。洗第一次我覺得效果還好，無特別明顯效果，不過用左一排真係覺得頭髮健康左！生髮嘛⋯⋯我就無點覺得喔

我終於明白點解呢個系列會係歐美咁紅！紅係有原因既，真係好正！佢首先可以當係去角質磨砂咁，輕輕按摩，顆粒好細滑；然後呢再敷多幾分鐘，當面膜咁，好保濕但又清潔到毛孔!正到爆啊!大推啊啊啊！

Nivea既止汗劑我自己覺得止汗效果都相當好，香味都好舒服，唔會覺得好濁。佢呢個止汗產品用完覺得好清爽，唔會好黏膩，基本上一整日止汗功能都好好。唔錯啊！

er.....呢個噴霧呢，真係噴霧黎既....勉強覺得保濕力都有些少既，唔會話噴完乾左頭髮依然開叉咁嚴重，算有些少保濕。不過如果問我有無順滑左呢啲頭髪，我會建議你買一隻修護既護髮素好過....

首先要稱讚一下，面霜分返早晚唔同係對於護膚品新手或者敏感肌既朋友好有利既！因為早晚既需求好唔一樣！如果你肌膚情況都唔錯，呢個面霜都適合，因為唔洗用多次防曬。但係如果你皮膚正係泛紅啊爆痘好嚴重既時候，有防曬既面霜就唔好用住啦，會刺激架！

Avalon Organics既洗頭水一直標榜有機自然既成分。呢個一打開你就會覺得好自然，因為無咩香精所以幾臭.....（我自己無好感既味道）佢屬於起泡力好低既洗頭水，唔會好似廣告啲洗髮水咁多泡，但係清潔力好夠，用完唔會覺得頭皮痕癢啊乾啊。

肌底液既功效相信大家都知道係深層修護皮膚，改善肌底既細胞。之前呢支肌底液相當火熱，我都試下，不過可能我自己肌膚無咩特別既皺紋問題，所以同我之前用既其他牌子肌底液相比我自己就覺得唔會特別有驚喜。